Header
2015-05-20 18.45.18

Kvennakirkjan leiðir guðsþjónustu í Mosfellskirkju

Kvennakirkjan leiðir guðsþjónustu í Mosfellskirkju sunnudaginn 25. október kl. 11:00. Tilefnið er tvíþætt, Mosfellskirkja heldur uppá 50 ára afmæli sitt á þessu ári og öld er liðin frá því að konur fengu kosningarétt. Að guðsþjónustu lokinni flytur Guðrún Ásmundsdóttir, leikkona, leikþátt um hina merku konu Ólafía Jóhannsdóttir sem fædd var á Mosfelli 1863, og kom m.a. við sögu sem baráttukona þess málefnis. Aðalheiður Þorsteinsdóttir tónlistarstjóri Kvennakirkjunnar leiðir tónlistina. Sr. Arndís Linn prestur Kvennkirkjunnar prédikar og konur Kvennakirkjunnar taka þátt. Að athöfn og leikþætti loknum býður Lágafellssókn í kaffi í Reykjadal.

Fyrsti fundur haustsins

October 1st, 2015 | Posted by admin in Uncategorized - (0 Comments)

Reykjavík 28. September 2015
Kæru Hvítabandsfélagar

Þá er runnið upp nýtt starfsár og verður súpu- og konfektfundur haldinn á Hallveigarstöðum miðvikudaginn 7.október 2015, klukkan 19.00 Athugið fundartímann.

Fundur settur
Hugvekja, Kristbjörg Unnur Sigurvinsdóttir
Almenn fundarstörf
Gestur fundarins verður Ragnheiður Jóhannsdóttir sem fræðir okkur um Álfaskó ofl.

Aðrir félagsfundir vetrarins verða sem hér segir:
4. nóvember kl.19:30
2. desember kl. 19:30, jólafundur
3. febrúar, kaffihús kl. 16:30 – Ath. breyttur fundartími
2. mars kl. 19:30, aðalfundur
6. apríl kl. 19:30, gestafundur
18. maí, vorferð í Sólheima í Grímsnesi, kl. 16.

Sunnudaginn 25. október verður guðþjónusta í Mosfellskirkju kl. 11 þar sem m.a. verður leikþáttur um Ólafíu Jóhannsdóttur.

Kaffinefndir vetrarins verða eftirfarandi:
Október: Stjórnin
Nóvember: Sigríður Sigurðardóttir, Valdís Ólafsdóttir, Sigrún Högnadóttir
Desember: Elín Snorradóttir, Auður María Aðalsteinsdóttir, Steinunn Þórðardóttir og Elín Þórðardóttir.
Febrúar: Kaffihús – nánar auglýst síðar.
Mars: Guðrún Kristjónsdóttir, Ingveldur Ingólfsdóttir, Unnur Sigurvinsdóttir
Apríl: Margrét Albertsdóttir, Þorbjörg og Margrét Guðmundsdætur

Nokkur fjöldi félaga hefur ekki greitt félagsgjaldið, kr. 2000, fyrir yfirstandandi ár. Við hvetjum ykkur til að standa skil á árgjaldinu og greiða inn á reikning Hvítabandsins kt. 650169-6119 bankanr. 137-15-370303, eins má greiða gjaldkera á fundum.
Hittumst hressar og ánægðar á viðburðum félagsins okkar í vetur og gestir ávalt velkomnir.

Stjórnin

Vigdís Finnbogadóttir

June 27th, 2015 | Posted by admin in Uncategorized - (0 Comments)

Þjóðin sem valdi Vigdísi! – Hátíðardagskrá sunnudaginn 28. júní á Arnarhóli kl. 19:30-21:10
þann 24. júní 2015.Frú Vigdís Finnbogadóttir
Þann 28. júní nk verður því fagnað í miðbæ Reykjavíkur að liðin eru 35 ár síðan þjóðin valdi Vigdísi Finnbogadóttur í embætti forseta Íslands. Stofnun Vigdísar Finnbogadóttur annast skipulag hátíðarhaldanna í samstarfi við Alþingi, Háskóla Íslands, Reykjavíkurborg, Samband íslenskra sveitarfélaga, Samtök atvinnulífsins, framkvæmdanefnd um 100 ára afmæli kosningaréttar kvenna, skógræktar- og landgræðslufélög ásamt fjölda annarra stofnana og félagasamtaka.

Fjölbreytt dagskrá verður flutt af stóru sviði við rætur Arnarhóls og hefst hún kl. 19:40 og stendur til rúmlega 21:10. Dagskráin verður blanda tónlistar og talaðs máls og verður hún send út í beinni útsendingu sjónvarps RÚV. Listrænn stjórnandi dagskrárinnar er Kolbrún Halldórsdóttir og stjórnandi útsendingarinnar verður Egill Eðvarðsson.

Í samstarfi við landssamtök kóra á Íslandi er unnið að því að fá söngfólk úr ýmsum kórum til að leggja hátíðinni til andblæ sumars með því að syngja sönglög sem hæfa tilefninu og allir geta tekið undir.

Dagskráin verður kynnt af ungu fólki úr sviðslistadeild Listaháskóla Íslands og Stúdentaleikhúsinu. Þau semja textana undir handleiðslu Andra Snæs Magnasonar rithöfundar og tengja atriðin saman. Blásarasveit, skipuð félögum úr sveitinni Wonderbrass, blæs inn hátíðina og Einar K Guðfinnsson, forseti Alþingis, flytur setningarræðu.

Tónlistaratriðin verða af ýmsu tagi, t.d. má nefna að Eivør Pálsdóttir kemur frá Færeyjum og flytur 2–3 lög. Palle Knudsen frá Danmörku og Ylva Kihlberg frá Svíþjóð flytja dúett Papagenos og Papagenu úr Töfraflautu Mozarts, ásamt sönglögum frá Svíþjóð og Danmörku, meðleikari þeirra verður Helga Bryndís Magnúsdóttir. Hljómsveitin Baggalútur verður með óvænt innlegg, auk þess sem hljómsveitin Samaris flytur tónlist innblásna af menningararfi þjóðarinnar. Þá verður frumflutt lagið Vigdís eftir Má Gunnarsson, 15 ára tónlistarmann, og mun höfundurinn njóta stuðnings annarra tónlistarmanna sem taka þátt í dagkránni.

Hátíðarræða verður flutt af rithöfundunum Kristínu Helgu Gunnarsdóttur og Jóni Kalman Stefánssyni og verður hún með óhefðbundnu sniði. Leikið atriði verður úr sýningunni Leitin að Jörundi – Sápuópera um Hundadagakonung. Það er leik- og söngkonan Edda Þórarinsdóttir, sem verður þar í aðalhlutverki ásamt Jörundi sjálfum og Tríó Karls Olgeirssonar leikur með í lögum úr verkinu. Þá flytur Hjörleifur Hjartarson fulltrúi Hunds í óskilum brot í bundnu máli úr Sögu þjóðar.

Dagskráin er skipulögð með það í huga að hún sé áhugaverð og upplýsandi fyrir þann hluta þjóðarinnar sem var ekki fæddur árið 1980 þegar Vigdís var kjörin forseti. Það hefur verið haft í huga við val dagskráratriða og er því tilvalið að stórfjölskyldan komi saman til hátíðarinnar. Ljúf samverustund, lautarferð á Arnarhól, að kvöldi sunnudagsins 28. júní, fyrir alla fjölskylduna.

2015-04-17 15.48.03-6Hvítabandið hefur verið starfrækt í 120 ár og hélt upp á þessi tímamót á afmælisdeginum en félagið var stofnað 17. apríl 1895 og hefur starfað óslitið síðan. Á hátíðarfundi var veittur styrkur til bágstaddra barnafjölskyldna að upphæð 1,2 milljónir króna, 1.000 kr. fyrir hvert starfsár og 1 fjölskylda fyrir hvern áratug sem Hvítabandið hefur verið starfrækt og fá því 12 fjölskyldur hver um sig 100.000 kr. í formi gjafakorta. Mæðrastyrksnefnd Reykjavíkur, sem Hvítabandið er aðili að, var falið að koma gjöfunum áleiðis í hendur þeirra þar sem þörfin er mest með áherslu á barnafjölskyldur.

Hvítabandið hefur frá upphafi helgað sig mannúðar- og líknarmálum. Stærsta einstaka verkefni félagsins er án efa bygging Sjúkrahúss Hvítabandsins við Skólavörðustíg sem félagið reisti á eigin kostnað og starfrækti í tæpan áratug. Upphaflega átti það að verða hvíldar- og hressingarheimili fyrir konur að aflokinni spítalavist en vegna mikils skorts á sjúkrarúmum í Reykjavík var því breytt í sjúkrahús og var fyrsta almenna sjúkrahúsið sem yfirvöld í höfuðstaðnum ráku en Hvítabandið gaf Reykjavíkurborg húsið með öllum áhöldum og innanstokksmunum.

Saga Hvítabandsins varpar ljósi á óformlegar valdaleiðir kvenna. Formæður okkar höfðu áhrifavald sem skipti sköpum í þróun velferðarmála á Íslandi og endurspeglar saga líknarfélaga þessi völd kvenna. Þeim tókst að hrinda í framkvæmd ýmsum mannúðar- og velferðarmálum sem eru í höndum hins opinbera í dag. Barátta formæðra okkar fyrir betra lífi endurspeglast í starfi félagsins. Saga Hvítabandsins sem sögð er í bókinni „Aldarspor“ leiðir í ljós framlag kvenna í mótun heilbrigðis- og félagsmála á Íslandi.

Vorferð 20. maí kl. 17.00

May 10th, 2015 | Posted by admin in Uncategorized - (0 Comments)

Stytta af Ólafíu

Eftir vel heppnaðan hátíðar- og afmælisfund lýkur starfinu í vetur með því að minnast Ólafíu Jóhannesdóttur, eina af stofnendum félagsins . Mæting er miðvikudaginn 20. maí kl. 17.00 við aðalhlið Gamla kirkjugarðsins, Ljósvallagötumegin. Gengið verður að leiði hennar þar sem lagður verður blómvöndur og kveikt á kerti. Því næst heimsækjum við kirkjustaðinn Mosfell í Mosfellsdal þar sem sr. Ragnheiður Jónsdóttir tekur á móti okkur, fræðir okkur um Mosfell, fæðingarstað Ólafíu og leggjum blómvönd við styttuna.
Ferðinni lýkur svo í Álafosskvosinni þar sem við snæðum ljúffenga kjúklingasúpu. Verðið er kr. 2.050.-, súpa, brauð og ábót og borgar hver fyrir sig.

Við ætlum að vera á einkabílum og biðjum ykkur um að sammælast um bíla. Þeir sem ekki hafa far eru beðnir um að láta vita um leið og þeir skrá sig og verður þeim útvegað bílfar.

Tilkynna þarf þátttöku í síðasta lagi sunnudagskvöldið 17. maí á netfangið:
hvitabandid (hja)hvitabandid.is
Einnig er hægt að hringja í okkur í ferðanefndinni:
Dagmar Sigurðardóttir (formaður) s. 565 8774
Ástríður Thoroddsen (varaformaður) s. 565 9434
Lydía Kristóbertsdóttir (gjaldkeri) s. 557 3092

Minnum einnig á félagsgjaldið kr. 2.000.- hægt er að leggja það inn á reikning félagsins:
kt. 650169-6119, banki 0137-15-370303

Hvetjum ykkur til að mæta og eru gestir velkomnir.

Með kveðju.
Ferðanefndin

Eins og undanfarin ár verður fundurinn í maí sameinaður vorferðinni og er fyrirhugað að fara seinni partinn í maí.
Það verður því ekki fundur miðvikudaginn 6. maí og ætti að skýrast fljótlega hvenær farið verður.

Í ferðanefnd eru Dagmar Sigurðardóttir, Ástríður Thoroddsen og Lydia Kristóbertsdóttir.

Þann 17. apríl nk. eru 120 ár liðin frá stofnun Hvítabandsins, líknarfélags.
Af því tilefni heldur félagið hátíðarfund að Hallveigarstöðum, Túngötu 14, Reykjavík, föstudaginn 17. apríl kl. 16:00 – 18:00.
Tilkynna þarf þátttöku í síðasta lagi 15. apríl á netfangið: hvitabandid(hja)hvitabandid.is.

Velunnurum félagsins er bent á líknarsjóð þess: kt. 650169-6119 banki 0117-15 – 370548

Stjórnin

Aðalfundur 2015

February 22nd, 2015 | Posted by admin in Uncategorized - (0 Comments)
Hvítabandið lógó sér

Aðalfundur Hvítabandsins 2015

að Hallveigarstöðum miðvikudaginn 4. mars kl. 19:30

Dagskrá
Venjuleg aðalfundarstörf
Stjórnarkjör
Skipan nefnda
Önnur mál

Kaffiveitingar annast Kristrún Ólafsdóttir, Dóra Ólafsdóttir og Ástríður Thoroddsen.

Ástríður Thoroddsen hefur tekið saman það sem hún kallar „örsögu“ um þátttöku kvenna við byggingu Landspítalans. Að aðalfundarstörfum loknum ætlar hún að deila með okkur þessum fróðleiksmolum sem verðugt er að rifja upp á 100. afmælisári kosningaréttar kvenna og 120. afmæli Hvítabandsins.

Já, Hvítabandið er 120 ára á þessu ári, því ber að fagna. Stjórnin hefur hafið undirbúning afmælisveislu sem halda skal á sjálfum stofndeginum 17. apríl. Góðum gestum hefur verið boðið í síðdegisboð sem við vonum að Hvítabandsfélagar fjölmenni á. Glæsilegar veitingar verða á boðstólum og ýmislegt til fróðleiks og skemmtunar fyrir veislugesti.

Kvenfélag Breiðholts býður Hvítabandskonum til kvöldstundar á fundi þriðjudaginn 17. mars kl. 19. Á aðalfundi könnum við þátttöku svo gestgjafar okkar geti vitað hve mörgum má gera ráð fyrir frá Hvítabandinu.

Stjórnin

Ágætu Hvítabandsfélagar.

Næsti fundur félagsins verður haldinn miðvikudaginn 4. febrúar á Grand hóteli (gengið inn Sigtúns meginn) kl. 16.00-17.30.
Við ætlum að njóta samverunnar og ræða um starfið framundan sem og annað sem konur vilja ræða saman um.
Í boði verður kaffi og kökuvagn sem inniheldur dýrindis tertur, brauðsnittur og eitthvað fleira gott fyrir 2.300 krónur á mann.
Stjórnin þarf að vita hversu margar geta mætt og því þarf að skrá sig á fundinn í síðasta lagi mánudaginn 2. febrúar n.k.
Hægt er að skrá sig með því að senda póst á hvitabandid(hjá)hvitabandid.is eða að hafa samband við formann félagsins Dagmar Sigurðardóttur í síma 5658774, gsm 8246129

Hlökkum til að sjá ykkur og eiga góða stund saman og eru gestir ávalt velkomnir.

Stjórnin


Formaður setur fund.
Ritari les fundargerð síðasta fundar.
Styrkjum verður úthlutað.

Við vonumst til að sjá á fundinum þá félaga Hvítabandsins, sem eiga stórafmæli á þessu ári. Þeim til heiðurs veitir Hvítabandið styrk til góðgerðamála. Það verður upplýst á fundinum hvert styrkurinn rennur.
Á jólafundinum verður að vanda safnað í sjóð til jólagjafakaupa fyrir börn kvenna sem dvelja á Dyngjunni um jólin og vonumst við eftir góðri þátttöku.
Góðir gestir koma á fundinn og flytja okkur jólalög við píanóundirleik.
Þær Guðrún Kristjónsdóttir, Kristjana Dröfn Haraldsdóttir, Margrét Albertsdóttir, Margrét Guðmundsdóttir og Þorbjörg Guðmundsdóttir hafa tekið að sér að koma upp hátíðarborði með gómsætum veitingum.
Sr. Birgir Ásgeirsson, prestur í Hallgrímskirkju, heimsækir okkur og flytur jólahugvekju.
Á fundinum verður lokakönnun á því hvort nægileg þátttaka verður í vorferð til Noregs. Ferðin er fjögurra daga frá 7. til 10. maí og tilboðsverð á flugferð og hóteli með morgunmat hljóðar upp á 83.500 kr.
Mætum vel í jólastemninguna á Kvennaheimilinu Hallveigarstöðum og tökum með okkur gesti.

Stjórnin